વલભીપુરના જુના રતનપર ગામની સીમમાં જુગાર રમતા 5 શખ્સો ઝડપાયા, એક ફરાર

નિલેશ આહીર

વલભીપુર તાલુકાના જુના રતનપર ગામની સીમમાં આવેલ વાડીમાં જુગાર રમી રહેલા 5 શખ્સોને પોલીસે રોકડ રકમ, મોબાઈલ તથા વાહન મળી કુલ 3 લાખથી વધુનો મુદ્દામાલ ઝડપી લીધો હતો જ્યારે એક શખ્સ નાસી છૂટવામાં સફળ રહ્યો હતો. સમગ્ર બનાવ અંગે વલ્લભીપુર પોલીસ મથકે થી મળતી માહિતી મુજબ સ્ટાફના માણસો ગ્રામ્ય વિસ્તારોમાં પેટ્રોલીંગમાં હતાં. તે દરમ્યાન બાતમીદારોએ ચોક્કસ બાતમી આપી હતી કે, વલ્લભીપુર તાલુકાના જુના રતનપર ગામની સીમમાં આવેલ વાડીની ખુલ્લી જગ્યામાં ગોળ કુંડાળુ વાળી જાહેર જગ્યામાં કેટલાક શખ્સો પૈસા-પાના વડે તિનપત્તિનો હારજીતનો જુગાર રમે છે જે હકીકત આધારે ટીમે સ્થળપર રેડ કરી 5 ઈસમોને અટક કર્યા હતા જયારે એક શખ્સ નાસી છૂટ્યા હતો.

ઝડપાયેલા શખ્સોમાં પ્રતાપ ખાચર, રાજુ કેવડિયા, વિનોદ જાદવ, મેહુર બોરીચા, ગોવિંદ મિયાણી ને ઝડપી લીધા હતા, જ્યારે અરવિંદ કેવડિયા નાસી છૂટ્યો હતો. રોકડ રકમ 1,16,000, ચાર મોટરસાઈકલ કિ.રૂ.1,20,000 તથા 6 મોબાઈલ કિ.રૂ.1,00,000 મળી કુલ રૂ.3,60,000 નો મુદ્દામાલ કબ્જે કરી તમામ શખ્સો વિરુદ્ધ વલ્લભીપુર પોલીસ સ્ટેશનમાં જુગારધારાની કલમ હેઠળ ગુન્હો નોંધી વધુ તપાસ હાથ ધરી હતી.