આંતરરાષ્ટ્રીય ક્રિકેટમાં 17000 રન પૂરા કરનાર સાતમો ભારતીય બન્યો રોહિત શર્મા, આ છે ટોપ બેટ્સમેનોની લિસ્ટ

ભારત અને ઓસ્ટ્રેલિયા (IND vs AUS) વચ્ચે અમદાવાદમાં રમાઈ રહેલી ટેસ્ટ મેચમાં રોહિત શર્માએ એક મહત્વપૂર્ણ આંકડો સ્પર્શ કર્યો છે. તેણે આ મેચના ત્રીજા દિવસે પોતાની ઇનિંગ્સનો 22મો રન પૂરો કરતાની સાથે જ આંતરરાષ્ટ્રીય ક્રિકેટમાં 17000 રન પૂરા કર્યા. આવું કરનાર તે ભારતનો 7મો બેટ્સમેન છે.

આ મોટો રેકોર્ડ હાંસલ કરવા માટે રોહિત શર્માએ 438 મેચની 457 ઇનિંગ્સ રમી હતી. તેની આંતરરાષ્ટ્રીય ક્રિકેટ કારકિર્દીમાં તેણે 43 સદી અને 91 અડધી સદી પણ ફટકારી છે. તેની બેટિંગ એવરેજ પણ 42થી વધુ રહી છે. આ દરમિયાન રોહિતે ટેસ્ટમાં 3379 રન, વનડેમાં 9782 રન અને T20 ઈન્ટરનેશનલમાં 3853 રન બનાવ્યા છે. ટેસ્ટ ક્રિકેટમાં જ્યાં તેની બેટિંગ એવરેજ 45.80 છે. આ સાથે જ તેણે વડનેમાં 48.91ની એવરેજથી રન બનાવ્યા છે. તેવી જ રીતે T20 ઈન્ટરનેશનલમાં રોહિતની બેટિંગ એવરેજ 31.32 છે.

આ ભારતીય બેટ્સમેનોના 17000+ રન છે

નંબર-1: ભારત માટે સૌથી વધુ આંતરરાષ્ટ્રીય રન બનાવવાનો રેકોર્ડ માસ્ટર બ્લાસ્ટર સચિન તેંડુલકરના નામે નોંધાયેલો છે. તેણે 664 આંતરરાષ્ટ્રીય મેચોની 782 ઇનિંગ્સમાં 34357 રન બનાવ્યા છે.
નંબર-2: વિરાટ કોહલી ભારત માટે બીજા સૌથી વધુ આંતરરાષ્ટ્રીય રન બનાવનાર ખેલાડી છે. આ બેટ્સમેને 493 મેચની 551 ઇનિંગ્સમાં 25 હજારથી વધુ રન બનાવ્યા છે.
નંબર-3: અહીં રાહુલ દ્રવિડ ત્રીજા સ્થાને છે. દ્રવિડે 24208 રન બનાવ્યા છે.
નંબર-4: ભૂતપૂર્વ ભારતીય કેપ્ટન સૌરવ ગાંગુલી આ યાદીમાં ચોથા સ્થાને છે. સૌરવ ગાંગુલીના નામે 18575 રન છે.
નંબર-5: ભારતના સૌથી સફળ કેપ્ટન એમએસ ધોનીએ આંતરરાષ્ટ્રીય ક્રિકેટમાં 17266 રન બનાવ્યા.
નંબર-6: ભૂતપૂર્વ વિસ્ફોટક બેટ્સમેન વીરેન્દ્ર સેહવાગના નામે 17253 આંતરરાષ્ટ્રીય રન છે.
નંબર-7: વર્તમાન ભારતીય કેપ્ટન રોહિત શર્માએ હવે આંતરરાષ્ટ્રીય ક્રિકેટમાં 17014 રન બનાવ્યા છે.