પાકિસ્તાનમાં સ્થિતિ બેકાબૂ, પંજાબ અને ખૈબર પ્રાંતમાં સેના તૈનાત; અત્યાર સુધીમાં આઠ લોકોના થયા મોત

ભ્રષ્ટાચારના આરોપમાં પૂર્વ વડાપ્રધાન ઈમરાન ખાનની ધરપકડ બાદ પાકિસ્તાનમાં સ્થિતિ કાબૂ બહાર થઈ રહી છે. ઈમરાનની ધરપકડના એક દિવસ બાદ બુધવારે પાકિસ્તાનના અનેક શહેરોમાં હિંસા ફાટી નીકળી હતી અને સ્થિતિ તંગ રહી હતી.

છેલ્લા 24 કલાક દરમિયાન કેટલાક શહેરોમાં ઈમરાન ખાનના સમર્થકો અને સુરક્ષા દળો વચ્ચે થયેલી હિંસક અથડામણમાં ઓછામાં ઓછા સાત લોકો માર્યા ગયા હતા અને લગભગ 300 અન્ય ઘાયલ થયા હતા. પોલીસે જણાવ્યું કે ભ્રષ્ટાચારના કેસમાં ઈમરાનની ધરપકડ બાદ તેના સમર્થકોએ પંજાબમાં 14 સરકારી ઈમારતો અને સંસ્થાઓને આગ ચાંપી દીધી હતી. તેઓએ 21 પોલીસ વાહનોને પણ આગ લગાવી દીધી હતી.

પંજાબ, ખૈબર-પખ્તુનખ્વા અને બલૂચિસ્તાનમાં સેના તૈનાત છે

ઈમરાનની પાર્ટી પાકિસ્તાન તહરીક-એ-ઈન્સાફ (પીટીઆઈ)ના સમર્થકો સાથેની અથડામણમાં સુરક્ષા દળોના 130 અધિકારીઓ અને કર્મચારીઓ ઘાયલ થયા હતા. કાયદો અને વ્યવસ્થા જાળવવા માટે પંજાબ, ખૈબર-પખ્તુનખ્વા અને બલૂચિસ્તાનમાં સેના તૈનાત કરવામાં આવી છે.

રાજધાની ઈસ્લામાબાદમાં પણ સેનાને ઉતારી દેવામાં આવી છે. દેખાવકારોએ લાહોરમાં વડા પ્રધાન શહેબાઝ શરીફના નિવાસસ્થાન પર હુમલો કર્યો. પોલીસના જણાવ્યા અનુસાર, બુધવારની વહેલી સવારે 500 થી વધુ પ્રદર્શનકારીઓ વડા પ્રધાનના નિવાસસ્થાને પહોંચ્યા હતા અને ત્યાં રાખવામાં આવેલા વાહનોને આગ ચાંપી દીધી હતી. તેઓએ રહેણાંક સંકુલમાં પેટ્રોલ બોમ્બ ફેંક્યા અને પોલીસ મથકને આગ ચાંપી દીધી.

ઈમરાનના સમર્થકો દેશભરમાં વિરોધ પ્રદર્શન કરી રહ્યા છે

ઇમરાનની ધરપકડથી ગુસ્સે ભરાયેલા સમર્થકોએ મંગળવારે સેનાના મુખ્યાલય પર હુમલો કર્યો હતો. લશ્કરી વાહનો અને સ્થાપનો પર હુમલો કરતી વખતે તેઓએ લાહોર કોર્પ્સ કમાન્ડરના નિવાસસ્થાને આગ લગાડી. ધરપકડની નિંદા કરતા પીટીઆઈએ બુધવારે દેશવ્યાપી હડતાળની જાહેરાત કરી હતી.

ડૉન અખબારે અહેવાલ આપ્યો છે કે પીટીઆઈ નેતૃત્વએ લોકોને “વધતા ફાસીવાદ” સામે રસ્તા પર ઉતરવાની અપીલ કરી હતી અને સમર્થકોને કહ્યું હતું કે “નિર્ણાયક લડાઈ” માટે ક્ષણ આવી ગઈ છે. ઈમરાનની ધરપકડના સમાચાર આવતા જ દેશભરમાં વિરોધ શરૂ થઈ ગયો. લાકડીઓ અને સળિયાઓથી સજ્જ તેમના સમર્થકોએ પાકિસ્તાન આર્મીના હેડક્વાર્ટર સહિત સુરક્ષા સંસ્થાઓને નિશાન બનાવી હતી.

વોશિંગ્ટનમાં પાક દૂતાવાસની બહાર દેખાવકારોનું પ્રદર્શન

પાકિસ્તાન તહરીક-એ-ઈન્સાફ (PTI) ના સમર્થકોએ પાકિસ્તાનના ભૂતપૂર્વ વડા પ્રધાન ઈમરાન ખાનની ધરપકડના વિરોધમાં વોશિંગ્ટનમાં પાકિસ્તાન દૂતાવાસની બહાર વિરોધ પ્રદર્શન કર્યું. દેખાવકારોએ ઈમરાન ખાનને મુક્ત કરવાની માંગ કરી હતી અને ચીફ જસ્ટિસ અને સેનાના જનરલો વિરુદ્ધ સૂત્રોચ્ચાર પણ કર્યા હતા.