Sihor
ગોપાલ ઇટાલિયા બેફામ : મોદીને નીચ કહ્યા : કરી મણીશંકરવાળી ભૂલ
મિલન કુવાડિયા
કેજરીવાલના રાઇટ હેન્ડ ગણાતા આપના પ્રદેશ પ્રમુખે પીએમ વિષે કરેલા બફાટથી ભાજપ લાલઘુમ : શરમજનક કૃત્ય ગણાવ્યું : મહિલા આયોગે ઇટાલિયાને આપી નોટીસ : ગુરૂવારે હાજર થવા ફરમાન : વિડીયોમાં ઇટાલિયાનો કથિત બેફામ વાણીવિલાસ
ગુજરાતમાં આમ આદમી પાર્ટીના વડા ગોપાલ ઈટાલિયાનો એક વીડિયો વાયરલ થઈ રહ્યો છે, જેમાં તેઓ પીએમ મોદી માટે અપમાનજનક શબ્દોનો ઉપયોગ કરતા જોવા મળી રહ્યા છે. ઈટાલિયા આમાં પીએમ મોદીને ‘નીચ પ્રકારના માણસ’ કહેતા સાંભળવા મળે છે. જો કે અમે આ વીડિયોની સત્યતાની પુષ્ટિ કરતા નથી. ઈટાલિયાના આ વીડિયોથી ભાજપમાં નારાજગી છે અને તેને મોટો મુદ્દો બનાવવાની તૈયારીઓ કરવામાં આવી છે. આ પહેલા ૨૦૧૭માં ગુજરાત ચૂંટણી પહેલા કોંગ્રેસના નેતા મણિશંકર ઐયરે પીએમ મોદી વિશે આવી જ ટિપ્પણી કરી હતી, જેના પર ભારે હોબાળો થયો હતો અને ઐય્યરે માફી માંગવી પડી હતી. ગુજરાતમાં આવનારી વિધાનસભાની ચૂંટણી વિશે વાત કરતાં તેમણે કહ્યું કે આ ‘નીચ પ્રકારનો માણસ’ અહીં રોડ શો કરી લોકોને ‘C’ બનાવી રહ્યો છે. તેમણે કહ્યું કે લોકો ‘C’ નો અર્થ સમજી રહ્યા છે.
પીએમ મોદી પર સમગ્ર ભારતને ‘C’ બનાવવાનો આરોપ લગાવતા તેમણે કહ્યું કે તેઓ ડિજિટલ ઈન્ડિયાની વાત કરે છે, પરંતુ પોતે વોટ આપવા માટે દિલ્હીથી ગુજરાત દોડી આવે છે. તેણે ૫૦ સેકન્ડની અંદર પીએમ મોદી માટે ઘણી વખત ‘નીચ’ શબ્દનો ઉપયોગ કર્યો. ગોપાલ ઈટાલિયા પહેલાથી જ વિવાદોમાં રહ્યા છે અને ભગવાન કૃષ્ણ પર વાંધાજનક ટિપ્પણી કરવા બદલ દ્વારકામાં તેમની સામે એફઆઈઆર પણ નોંધવામાં આવી છે. આ અંગે ઉમરાળા તાલુકા પોલીસ મથકે ગુનો નોંધાતા આહીર સમાજના અમિતભાઈ ડાંગરે જણાવ્યું હતું કે તેણે ભગવાન કૃષ્ણ માટે ‘રક્ષા’ શબ્દનો ઉપયોગ કર્યો છે. અગાઉ, ગુજરાતના ગૃહમંત્રી હર્ષ સંઘવીને ‘ડ્રગ્સ સંઘવી’ અને બીજેપીના પ્રદેશ અધ્યક્ષ સીઆર પાટીલને ‘દારૂની’ દાણચોરી’ કહેવા બદલ કેસ નોંધવામાં આવ્યા છે.
બીજેપીના આઈટી સેલના વડા અમિત માલવિયાએ ગોપાલ ઈટાલિયાના લેટેસ્ટ વીડિયો પર કટાક્ષ કર્યો અને કહ્યું કે તેઓ પણ હવે અરવિંદ કેજરીવાલના સ્તરે આવી ગયા છે. તેમણે કહ્યું કે, છેલ્લા ૨૭ વર્ષથી પીએમ મોદીને પોતાનો અમૂલ્ય મત આપનાર દરેક ગુજરાતીનું અપમાન છે, જેમના પર રાજયને ગર્વ છે તેવા ગુજરાતના લાલ માટે આવા શબ્દોનો ઉપયોગ કરવો. વડાપ્રધાન નરેન્દ્ર મોદી પણ હાલ ગુજરાતના પ્રવાસે છે. ગુજરાત વિધાનસભા ચૂંટણીને આડે હવે થોડા જ દિવસો બાકી છે. ત્યારે તમામ પક્ષના નેતાઓ ગુજરાતની જનતાને પોતાની વાત સમજાવવા એડીચોટીનું જોર લગાવી રહ્યા છે. ત્યારે ભાજપના અમિત માલવિયાએ આમ આદમી પાર્ટીના પ્રદેશ પ્રમુખ ગોપાલ ઇટાલિયાનો એક વીડિયો શેર કર્યો છે. જેમાં તે દેશના વડાપ્રધાન મોદી અંગે આપત્તિજનક શબ્દો બોલી રહ્યા છે. જે અંગે મહિલા આયોગે ગોપાલ ઇટાલિયાને નોટિસ ફટકારી છે. આ ગુરૂવારે ગોપાલ ઇટાલિયાને આયોગ સામે હાજર રહેવાનું પણ જણાવવામાં આવ્યુ છે. ૧૩મી ઓક્ટોબરના, ગુરૂવારે આ મામલા અંગે સુનાવણી થશે.
