G-20 Tourism Meeting : ગુજરાતના ધોરડોમાં યોજાશે મુખ્ય કાર્યક્રમ

જી-20 બેઠક ગુજરાતના કચ્છના રણમાં પ્રસ્તાવિત છે અને મુખ્ય સમિટ ફેબ્રુઆરીની શરૂઆતમાં ધોરડોમાં યોજવાનું આયોજન છે. પ્રતિનિધિઓ યુનેસ્કો વર્લ્ડ હેરિટેજ સાઈટ ધોળાવીરા અને ભુજ ખાતેના સ્મારકની પણ મુલાકાત લેશે. કેન્દ્રીય પ્રવાસન સચિવ અરવિંદ સિંહે મંગળવારે જણાવ્યું હતું કે 7-9 ફેબ્રુઆરી દરમિયાન યોજાનાર મુખ્ય કાર્યક્રમમાં ભારત અને વિદેશના લગભગ 75-100 પ્રતિનિધિઓ ભાગ લે તેવી અપેક્ષા છે.

એક કાર્યક્રમ દરમિયાન એક પ્રશ્નના જવાબમાં તેમણે કહ્યું કે, આ કાર્યક્રમમાં કેન્દ્રીય પ્રવાસન મંત્રી, ગુજરાતના મુખ્યમંત્રી અને કેટલાક કેન્દ્રીય મંત્રીઓ ભાગ લેશે. તમામ તૈયારીઓ પૂર્ણ કરી લેવામાં આવી છે અને અમને વિદેશી પ્રતિનિધિઓ અને કેટલીક આંતરરાષ્ટ્રીય સંસ્થાઓના સભ્યો તરફથી સારો પ્રતિસાદ મળી રહ્યો છે જેઓ તેમાં ભાગ લેશે.

કેન્દ્રીય પર્યટન મંત્રી જી કિશન રેડ્ડીએ મંગળવારે ભારતની મુસાફરીને પ્રોત્સાહિત કરવા માટે ‘વિઝિટ ઈન્ડિયા યર 2023’ અભિયાન શરૂ કર્યું. ભારત હાલમાં G-20ની અધ્યક્ષતા કરી રહ્યું છે.

“આ વર્ષ ભારત માટે ખૂબ જ મહત્વપૂર્ણ છે કારણ કે તે G-20 ની અધ્યક્ષતા કરી રહ્યું છે, અને 55 સ્થળોએ 200 થી વધુ બેઠકો થશે અને “આ વર્ષે એક લાખથી વધુ વિદેશી પ્રતિનિધિઓ ભારતની મુલાકાત લેશે,” તેમણે કહ્યું.

રેડ્ડીએ કહ્યું, “અમારો પ્રયાસ મુલાકાતી પ્રતિનિધિઓને અમારા સ્થળો, સ્મારકો, સંસ્કૃતિ, તહેવારો વિશે માહિતગાર કરવાનો છે. પ્રવાસનના દૃષ્ટિકોણથી સમગ્ર ભારતમાં અનેક કાર્યક્રમોનું આયોજન કરવામાં આવશે.