ભાવનગર જિલ્લા ભાજપ પ્રમુખ તરીકે પૂર્વ મંત્રી આર.સી મકવાણાએ વિધિવત રીતે પદભાર સંભાળ્યો

મિલન કુવાડિયા

જીલ્લા ભાજપ અધ્યક્ષનો પદભાર સંભાળતા આર.સી મકવાણા, સમારોહ વેળાએ કાર્યકરો મોટી સંખ્યામાં ઉપસ્થિત રહ્યા

ભાવનગર જિલ્લા ભાજપ પ્રમુખ તરીકે પૂર્વ મંત્રી આર.સી મકવાણાએ વિધિવત રીતે આજે મહાદેવજીના દર્શન કરી પદભાર સંભાળી લીધો છે. આર.સી મકવાણા પ્રમુખનું પદ સંભાળતા જ સ્વીકાર્યું છે કે, ખેડૂતોને ડુંગળીમાં ખૂબ જ ઓછા ભાવ મળી રહ્યા હતા સાથે જ એ પણ જણાવ્યું કે, આવનારા દિવસોમાં સૌની યોજના થકી સૌરાષ્ટ્રમાં 115 ચેકડેમને બદલે 132 ચેકડેમ ભરવામાં આવશે. ભાવનગર જિલ્લાના ભાજપ પ્રમુખ તરીકે ગુલાબનો તાજ આજે મહુવાના પૂર્વ ધારાસભ્ય અને રાજ્ય કક્ષાના પૂર્વ મંત્રી આર.સી મકવાણાને સોંપવામાં આવ્યો છે. આર.સી મકવાણાએ જિલ્લા ભાજપ કાર્યાલય પર કાર્યકરોની ઉપસ્થિતિમાં જિલ્લા પ્રમુખની જવાબદારી સંભાળી લીધી છે.

જોકે માનવામાં આવી રહ્યું છે કે 2022 ની વિધાનસભા ચૂંટણીમાં મહુવા થી ભાજપે આર.સી મકવાણાનું પત્તું કાપ્યું હતું જેના કારણે પૂર્વ ધારાસભ્ય ખૂબ જ નારાજ હતા, માટે પ્રદેશ મોવડી મંડળ દ્વારા મહુવાના પૂર્વ ધારાસભ્ય આર.સી મકવાણાની નારાજગી દૂર કરવા માટે ભાવનગર જિલ્લા ભાજપ પ્રમુખ તરીકેની જવાબદારી સોંપી દેવામાં આવી છે. મહુવાના પુર્વ ધારાસભ્ય રાઘવજી મકવાણા (આર.સી.) એ આજે પોતાનો પદભાર સંભાળી લીધો હતો. આ તકે પુર્વ પ્રમુખ મુકેશ લંગાળીયા, પ્રદેશના નેતા મહેન્દ્રસિંહ સરવૈયા તથા જીલ્લા ભાજપ સગઠનના પુર્વ હોદેદારો, વરિષ્ઠો, આગેવાનો અને કાર્યકર્તાઓ ઉપસ્થિત રહ્યા હતા.