સિહોરના જીઆઇડીસી 4 ઘાંઘળી રોડનું ધોવાણ, મોત સમાન ખાડાઓની ભરમાર

પવાર

• વરસાદના કારણે રોડની સ્થિતિ વધુ બગડી, વાહનચાલકો પર જીવનું જોખમ, મોટા-મોટા ખાડા પડયાં, ગંભીર અકસ્માતો છતાં તંત્ર પાસે ખાડા પૂરવાનો સમય નથી

સિહોર શહેરમાં અનેક અસુવિધાઓથી પ્રજા ત્રાહીમામ છે. અનેક ખરાબ રસ્તાથી વાહનચાલકો પરેશાની ભોગવી રહ્યાં છે. આ રસ્તા પર વાહનો ફસાવવાના તેમજ અકસ્માત થવાના પણ બનાવો વધી રહ્યાં છે. ત્યારે તંત્ર દ્વારા રસ્તા માટે યોગ્ય કાર્યવાહી હાથ ધરે તેવી લોકોમાંગ ઉઠી છે.

૨૪ કલાક ટ્રાફિકથી ધમધમતા સિહોરના ઘાંઘળી રોડની દુર્દશાથી વાહનચાલકો ઉપર જીવનું જોખમ મંડરાઈ રહ્યું છે. હાઈવે પર પડેલા મોટા-મોટા ખાડાના કારણે વાહનોને નુકશાની થઈ રહી છે. જેનાથી સામાન્ય જનતા ઉપરાંત ઉદ્યોગકારો પણ પરેશાન થઈ ગયા છે. સિહોરનો ઘાંઘળી રોડ રાજ્ય ધોરીમાર્ગનો એક ભાગ છે. પરંતુ આ રોડની હાલત ગામડાના રસ્તા કરતા પણ વધુ ખરાબ બની ગઈ છે. વરસાદમાં ધોવાણના કારણે ઘાંઘળી રોડ પર મોટા-મોટા ખાડા પડી ગયા છે. જેના કારણે ભૂતકાળમાં ગંભીર અકસ્માતો સર્જાયા છે. તેમ છતાં માર્ગ અને મકાન વિભાગ દ્વારા રસ્તાનું રિપેરીંગ કામમાં કરવામાં આવ્યું નથી. જેના કારણે આ માર્ગ પરથી કોઈપણ વાહનચાલકને પસાર થવું દુઃસ્વપ્ન સમાન બની ગયું છે. રોડની દુર્દશાને કારણે વાહનોમાં નુકશાની એ રોજિંદી બાબત બની ગઈ છે.

આ રસ્તો અમદાવાદ અને પાલિતાણાને જોડે છે. જેથી ખાનગી વાહનો, સરકારી બસની સતત અવર-જવર રહેતી હોય છે. ત્યારે વરસાદના સમયમાં આ માર્ગ મુસાફરી માટે જીવલેણ પણ સાબિત થઈ શકે તેમ છે. વળી, ઘાંઘળી રોડ, સિહોર જીઆઈડીસી-ર વગેરે જગ્યાએ સ્ટીલ રી-રોલીંગ મીલ, ઈન્ડક્શન ફર્નેશ ઈન્ડસ્ટ્રીઝો આવેલી હોય, હાઈવે રોડની જર્જરીત હાલતથી ઉદ્યોગકારો પણ પરેશાન થઈ ચુક્યા છે. આ રોડ પર સિહોરને ધમધમતું રાખનાર જીઆઇડીસી બે નંબર તથા ચાર નંબર એમ બે જીઆઇડીસી આવેલ છે. હજ્જારો કારીગરો આ રોડ પર પોતાના ધંધા માટે આવન જાવન કરે છે. આ દરેક જીવના જોખમે મુસાફરી કરતા જોવા મળે છે. આ રોડની હાલત અત્યંત દયનિય બની ગઇ છે.