ભાવનગર પોલીસે ડમીકાંડમાં વધુ 3 આરોપીને દબોચ્યા, કુલ આરોપીનો આંકડો 56 પહોંચ્યો

બરફવાળા

ગુજરાતના ચકચારી ડમીકાંડ કેસમાં પોલીસે વધુ ત્રણ આરોપીને પકડી પાડવામાં સફળ થઈ છે. ભાવનગર પોલીસ દ્વારા અગાઉ 53 લોકોની ડમીકાંડ કેસમાં ધરપકડ કરવામાં આવી હતી, ત્યારે આજે વધુ ત્રણ આરોપીઓ પકડાતાં ડમીકાંડ કેસમાં આરોપીઓની સંખ્યા 56 થઈ ગઈ છે. ઉલ્લેખનીય છે કે, ભાવનગર પોલીસે ડમીકાંડ કેસમાં 58 લોકો સામે ફરિયાદ નોંધવામાં આવી છે. કેટલાક મહિના અગાઉ વિદ્યાર્થી નેતા યુવરાજસિંહ જાડેજા ડમીકાંડ ઉજાગર કરવામાં આવ્યો હતો, ત્યાર બાદ આ ડમીકાંડમાં પકડાયેલા એક આરોપી દ્વારા જ યુવરાજસિંહે તોડ કર્યો હોવાના આક્ષેપ કર્યા હતા. જેના કારણે હવે યુવરાજસિંહ પણ જેલના સળિયા ગણી રહ્યા છે.

યુવરાજસિંહ જાડેજાએ ડમીકાંડ ઉજાગર કર્યા બાદ ભાવનગર પોલીસ દ્વારા એક SITની રચના કરવામાં આવી હતી અને તપાસ કરતાં અત્યાર સુધી 56 આરોપીઓની ધરપકડ કરી લેવામાં આવી છે. આજે ભાવનગર SOGએ રમણીક બારૈયા, ચંદુ પંડ્યા અને કલ્પેશ પંડ્યાની ધરપકડ કરી છે. આ કેસમાં હજુ 2 આરોપીઓ પકડાવવાના બાકી છે. આ ઉપરાંત પણ તપાસમાં હજુ વધારે નામ ખૂલવાની આશંકાઓ પણ વ્યક્ત કરવામાં આવી રહી છે.