રાહુલ ગાંધી, અશોક ગેહલોત કે શશિ થરૂર… કોંગ્રેસનું સુકાન કોના હાથમાં રહેશે?

કોંગ્રેસ પ્રમુખ પદ માટે ઉત્તેજના તેજ થઈ ગઈ છે. અત્યાર સુધી રાજસ્થાનના સીએમ અશોક ગેહલોત અને કોંગ્રેસના સાંસદ શશિ થરૂર કોંગ્રેસ અધ્યક્ષ પદની રેસમાં સામેલ હોવાનું માનવામાં આવે છે. સાથે જ રાહુલ ગાંધીના નામ પર પણ સસ્પેન્સ છે.

કોંગ્રેસના વરિષ્ઠ નેતા શશિ થરૂરે સોમવારે પાર્ટીના વચગાળાના અધ્યક્ષ સોનિયા ગાંધી સાથે તેમના નિવાસસ્થાને મુલાકાત કરી હતી. તેમણે આ વિશે કોઈ માહિતી આપી નથી, પરંતુ સૂત્રોનું કહેવું છે કે તેમને પાર્ટી અધ્યક્ષ પદ માટે આગામી ચૂંટણી લડવા માટે સોનિયા પાસેથી મંજૂરી મળી ગઈ છે. તેઓ આગામી થોડા દિવસોમાં પોતાની ઉમેદવારીની જાહેરાત કરી શકે છે.

આ સાથે સુત્રોના જણાવ્યા અનુસાર રાજસ્થાનના સીએમ અશોક ગેહલોત પણ આગ્રહ કરી રહ્યા છે કે રાહુલ અધ્યક્ષ પદ માટે ચૂંટણી લડવાના બદલે પદ સંભાળે. આ માટે તેઓ રાહુલને મનાવવાનો પણ પ્રયાસ કરી રહ્યા છે.

રાહુલ ગાંધીની ફેસબુક પોસ્ટ પરથી લોકો અનુમાન લગાવી રહ્યા છે

હવે તમને રાહુલ ગાંધી વિશે પ્રશ્ન થશે. તમે ખુદ રાહુલ ગાંધીની ફેસબુક પોસ્ટ પરથી જવાબનો અંદાજ લગાવી શકો છો. રાહુલ ગાંધીએ ફેસબુક પર લખ્યું છે કે જ્યારે નાવ અધવચ્ચે ફસાઈ જાય છે ત્યારે સુકાન હાથમાં લેવું પડે છે. અટકશે નહીં, ઝૂકશે નહીં, ભારતને એક કરશે. તો શું આનો અર્થ એવો થવો જોઈએ કે રાહુલ ગાંધી ફરીથી કોંગ્રેસ અધ્યક્ષ માટે પોતાનો દાવો દાખવશે, એટલે કે તેઓ પાર્ટીની બાગડોર પોતાના હાથમાં લેશે?

રાહુલ ગાંધીની તરફેણમાં 7 રાજ્યોમાં પ્રસ્તાવ પાસ થયો

રાહુલ ગાંધી કોંગ્રેસ અધ્યક્ષ પદ માટે ચૂંટણી લડશે કે નહીં તે અંગે સ્પષ્ટપણે કંઈ કહેવામાં આવ્યું નથી. પરંતુ તેમનો દાવો મજબૂત છે, તેમાં કોઈ શંકા નથી. કોંગ્રેસ અધ્યક્ષની ચૂંટણી પહેલા 7 રાજ્યોની કોંગ્રેસ સમિતિઓએ પાર્ટીની કમાન રાહુલ ગાંધીને સોંપવાનો ઠરાવ પસાર કર્યો છે. તાજેતરમાં, મહારાષ્ટ્ર, બિહાર, જમ્મુ-કાશ્મીર અને તમિલનાડુની કોંગ્રેસ સમિતિએ તેનો ઠરાવ પસાર કર્યો હતો, જ્યારે રાજસ્થાન, ગુજરાત અને છત્તીસગઢ તેને પહેલાથી જ મંજૂરી આપી ચૂક્યા છે. કોંગ્રેસ અધ્યક્ષની ચૂંટણીનું જાહેરનામું 23 સપ્ટેમ્બરે બહાર પાડવામાં આવશે, જ્યારે ચૂંટણી 17 ઓક્ટોબરે પ્રસ્તાવિત છે.