IPLમાં આ 3 બોલરોએ નેટ બોલરમાંથી મુખ્ય ટીમમાં સ્થાન મેળવ્યું, આ લિસ્ટમાં પર્પલ કેપ મેળવનાર ખેલાડી

IPL 2023ની પ્રથમ મેચ ગુજરાત ટાઇટન્સ અને ચેન્નાઇ સુપર કિંગ્સ વચ્ચે રમાશે. IPLમાં રમવાની તમામ ખેલાડીઓની ઈચ્છા હોય છે. આ વખતે IPLમાં ત્રણ એવા ખેલાડીઓ જોવા મળશે, જે પહેલા નેટ બોલર તરીકે રમતા હતા. આ ખેલાડીઓમાં એક બોલર પણ છે, જે પર્પલ કેપ જીતી ચૂક્યો છે. આવો જાણીએ આ ખેલાડીઓ વિશે.

1. મોહિત શર્મા
મોહિત શર્મા વર્ષ 2022માં ગુજરાત ટાઇટન્સમાં નેટ બોલર તરીકે જોડાયો હતો. ત્યારપછી તેને ગુજરાત ટાઇટન્સ દ્વારા IPL 2023 મીની હરાજીમાં સામેલ કરવામાં આવ્યો હતો. આ પહેલા વર્ષ 2013માં તેણે ચેન્નાઈ સુપર કિંગ્સ તરફથી IPLમાં ડેબ્યૂ કર્યું હતું. ત્યારબાદ તેણે પોતાની બોલિંગથી બધાને પ્રભાવિત કર્યા. તે ઇનિંગ્સની શરૂઆતમાં ખૂબ જ કિલર બોલિંગ કરતો હતો. તેણે IPLની 86 મેચમાં 92 વિકેટ લીધી છે. મોહિતે આઈપીએલ 2014માં પર્પલ કેપ પણ જીતી હતી. ત્યારબાદ તેણે 16 મેચમાં 23 વિકેટ ઝડપી હતી.

2. મુકેશ કુમાર
મુકેશ કુમાર ગયા વર્ષ સુધી દિલ્હી કેપિટલ્સ માટે નેટ બોલર તરીકે જોડાયેલા હતા. આઈપીએલ 2023ની મીની હરાજીમાં તેને દિલ્હી કેપિટલ્સે રૂ. 5.5 કરોડમાં ખરીદ્યો હતો. તેણે હજુ સુધી IPLમાં ડેબ્યુ કર્યું નથી. તેણે ડોમેસ્ટિક ક્રિકેટમાં બંગાળ માટે અજાયબીઓ કરી હતી. હવે તે IPL 2023માં પોતાનું કૌશલ્ય બતાવવા માટે આતુર હશે. તે ઇનિંગ્સની શરૂઆતમાં કિલર બોલિંગ કરે છે.

3. જોશુઆ લિટલ
આયર્લેન્ડના સ્ટાર બોલર જોશુઆ લિટલને ચેન્નાઈ સુપર કિંગ્સ માટે નેટ બોલર તરીકે જોડવામાં આવ્યો હતો. ત્યારબાદ તેણે ટી20 વર્લ્ડ કપ 2022માં આયર્લેન્ડની ટીમ માટે શાનદાર પ્રદર્શન કર્યું અને પોતાની રમતથી બધાનું દિલ જીતી લીધું. તેના કારણે આયર્લેન્ડની ટીમ ટી20 વર્લ્ડ કપમાં સારું પ્રદર્શન કરી શકી હતી. ત્યારબાદ IPL 2023ની મિની ઓક્શનમાં ગુજરાત ટાઇટન્સે તેને 4.4 કરોડ રૂપિયામાં ખરીદ્યો હતો.