RBI ગવર્નરે દુનિયાભરમાં ફરકાવ્યો ધ્વજ, PM મોદીએ ખુશીમાં પોતાના અભિનંદન સંદેશમાં આ કહ્યું

યુએસ સ્થિત ગ્લોબલ ફાઇનાન્સ મેગેઝિને આરબીઆઈ ગવર્નર શક્તિકાંત દાસને વૈશ્વિક સ્તરે ટોચના કેન્દ્રીય બેન્કર તરીકે સ્થાન આપ્યું છે. દાસને ગ્લોબલ ફાઇનાન્સ સેન્ટ્રલ બેન્કર રિપોર્ટ કાર્ડ્સ 2023માં ‘A+’ ગ્રેડ રેટિંગ આપવામાં આવ્યું છે. RBI ગવર્નર શક્તિકાંત દાસ પણ ત્રણ સેન્ટ્રલ બેંક ગવર્નરોની યાદીમાં ટોચ પર છે જેમને ‘A+’ રેટિંગ આપવામાં આવ્યું છે. સ્વિટ્ઝર્લેન્ડના ગવર્નર થોમસ જે જોર્ડન અને વિયેતનામની સેન્ટ્રલ બેંકના ચીફ ગુયેન થી હોંગને પણ ‘A+’ રેટિંગ મળ્યું છે.

‘A+’ ગ્રેડિંગનો અર્થ છે ઉત્તમ પ્રદર્શન

ગ્લોબલ ફાઇનાન્સ મેગેઝિનના વાર્ષિક ‘સેન્ટ્રલ બેંકર રિપોર્ટ કાર્ડ’નો ઉદ્દેશ્ય એવા સેન્ટ્રલ બેંક ગવર્નરોને ઓળખવાનો છે જેમણે નવીન, સર્જનાત્મક અને વ્યૂહરચના આધારે શ્રેષ્ઠ દેખાવ કર્યો છે. ફુગાવાને નિયંત્રિત કરવા, આર્થિક વૃદ્ધિ, ચલણની સ્થિરતા અને વ્યાજ દર વ્યવસ્થાપન જેવા મુદ્દાઓને ગ્રેડિંગમાં ધ્યાનમાં લેવામાં આવ્યા હતા. મેગેઝિન દ્વારા A થી F સુધી ગ્રેડિંગ કરવામાં આવે છે. ‘A+’ ગ્રેડિંગનો અર્થ થાય છે ઉત્કૃષ્ટ પ્રદર્શન, જ્યારે ‘F’ ગ્રેડનો અર્થ થાય છે સંપૂર્ણ નિષ્ફળતા.

પીએમ મોદીએ ટ્વિટ કરીને અભિનંદન પાઠવ્યા છે

પીએમ મોદીએ આરબીઆઈ ગવર્નરની સફળતા પર ખુશી વ્યક્ત કરી. તેમણે પોતાના ટ્વિટ (X)માં કહ્યું કે ‘RBI ગવર્નર શક્તિકાંત દાસને અભિનંદન. તે ભારત માટે ગર્વની ક્ષણ છે, જે વૈશ્વિક મંચ પર આપણા નાણાકીય નેતૃત્વને પ્રતિબિંબિત કરે છે. તેમનું સમર્પણ અને દૂરંદેશી આપણા દેશના વિકાસના માર્ગને વધુ મજબૂત બનાવતી રહેશે.

દાસ ઉપરાંત, ‘A’ રેટિંગ ધરાવતા અન્ય દેશોના કેન્દ્રીય બેંક ગવર્નરોમાં બ્રાઝિલના રોબર્ટો કેમ્પોસ નેટો, ઈઝરાયેલના અમીર યારોન, મોરેશિયસના હરવેશ કુમાર સીગોલમ અને ન્યુઝીલેન્ડના એડ્રિયન ઓરનો સમાવેશ થાય છે. ‘A-‘ ગ્રેડમાં કોલંબિયાના લિયોનાર્ડો વિલર, ડોમિનિકન રિપબ્લિકના હેક્ટર વાલ્ડેઝ આલ્બિજુ, આઈસલેન્ડના અસગીર જોન્સન, ઈન્ડોનેશિયાના પેરી વાર્ઝિયો અને અન્યનો સમાવેશ થાય છે.