ઇસ્લામિક સ્ટેટના આતંકવાદીઓએ પશ્ચિમ યુગાન્ડામાં એક શાળાને નિશાન બનાવીને 25ની હત્યા કરી

ઇસ્લામિક સ્ટેટ સાથે જોડાયેલા આતંકવાદીઓએ ડેમોક્રેટિક રિપબ્લિક ઓફ કોંગોની સરહદ નજીક પશ્ચિમ યુગાન્ડામાં એક શાળા પર હુમલો કર્યો. આ આતંકી હુમલામાં 25 લોકોના મોત થયા હતા. યુગાન્ડા પોલીસે શનિવારે આ માહિતી આપી હતી.

હોસ્ટેલમાં આગ લગાડી અને ખોરાક લૂંટાયો
પોલીસે જણાવ્યું હતું કે પૂર્વીય કોંગોમાં સ્થિત યુગાન્ડાના જૂથ એલાઈડ ડેમોક્રેટિક ફોર્સીસ (એડીએફ) ના સભ્યોએ 16 જૂનના રોજ મોડી રાત્રે એમપોંડવેમાં લુબિરીરા માધ્યમિક શાળા પર હુમલો કર્યો હતો. આ ઉપરાંત હોસ્ટેલમાં આગ લગાડવામાં આવી હતી અને ખાવા-પીવાની વસ્તુઓની પણ લૂંટ કરવામાં આવી હતી. ટ્વિટર પર આ માહિતી આપતા યુગાન્ડા પોલીસે કહ્યું કે અત્યાર સુધીમાં શાળામાંથી 25 મૃતદેહો મળી આવ્યા છે અને બાવેરા હોસ્પિટલમાં મોકલવામાં આવ્યા છે. બાવેરા હોસ્પિટલમાં આઠ પીડિતોની હાલત ગંભીર છે.

મૃતકોમાં કેટલા શાળાના બાળકો?
પોલીસે જણાવ્યું નથી કે મૃતકોમાં કેટલા સ્કૂલના બાળકો છે. પોલીસે જણાવ્યું કે સૈનિકો હુમલાખોરોનો પીછો કરી રહ્યા હતા જેઓ ડેમોક્રેટિક રિપબ્લિક ઓફ કોંગોના વિરુંગા નેશનલ પાર્ક તરફ ભાગી ગયા હતા. એપ્રિલમાં, ADF એ પૂર્વીય ડેમોક્રેટિક રિપબ્લિક ઓફ કોંગોના એક ગામ પર હુમલો કર્યો, જેમાં ઓછામાં ઓછા 20 લોકો માર્યા ગયા. યુગાન્ડાએ ADF સામે લડવામાં મદદ માટે કોંગોમાં સૈનિકો મોકલ્યા છે.