ભારતની દીકરીઓએ ICC અંડર-19 મહિલા T20 વર્લ્ડ કપનો ખિતાબ જીતીને વધાર્યું દેશનું ગૌરવ, ફાઇનલમાં ઇંગ્લેન્ડને ધૂળ ચટાવી

ભારતીય અંડર-19 મહિલા ક્રિકેટ ટીમે રવિવારે ICC મહિલા T20 વર્લ્ડ કપનો ખિતાબ જીતીને ઈતિહાસ રચ્યો છે. આ પ્રથમ વખત છે જ્યારે ભારતીય મહિલા (સિનિયર અથવા જુનિયર) વર્લ્ડ કપનો ખિતાબ જીત્યો છે. શેફાલી વર્માની આગેવાની હેઠળની ભારતીય અંડર-19 મહિલા ક્રિકેટ ટીમે પોચેફસ્ટ્રુમ ખાતે રમાયેલી ફાઇનલમાં ઇંગ્લેન્ડને 36 બોલ બાકી રહેતા સાત વિકેટથી હરાવ્યું હતું.

અંડર-19 T20 વર્લ્ડ કપની ફાઇનલમાં ઇંગ્લેન્ડે પ્રથમ બેટિંગ કરી અને સમગ્ર ટીમ 17.1 ઓવરમાં માત્ર 68 રનમાં ઓલઆઉટ થઈ ગઈ. જવાબમાં ભારતીય ટીમે 14 ઓવરમાં ત્રણ વિકેટ ગુમાવીને લક્ષ્યાંક હાંસલ કરી લીધો હતો. ભારતીય અંડર-19 મહિલા ક્રિકેટ ટીમ ICC અંડર-19 મહિલા T20 વર્લ્ડ કપની પ્રથમ ચેમ્પિયન બની હતી.

ભારતની ઇનિંગ્સની સ્થિતિ
શેફાલી વર્મા (15) અને શ્વેતા સેહરાવતે (5) ભારતીય મહિલા ક્રિકેટ ટીમને 69 રનના આસાન લક્ષ્યાંકનો પીછો કરતા ધમાકેદાર શરૂઆત કરી હતી. બેકરે ભારતને પહેલો ઝટકો આપ્યો જ્યારે વર્માને મિડ-ઓન પર સ્ટોનહાઉસ દ્વારા કેચ કરાવ્યો. આ પછી શ્વેતા સેહરાવતે સ્ક્રિવેન્સની બોલ પર ખરાબ શોટ રમીને પોતાની વિકેટ ગુમાવી હતી. બેકરે શોર્ટ ફાઈન લેગ પર સેહરાવતનો સરળ કેચ લીધો હતો.

અહીંથી સૌમ્યા તિવારી (24*) અને ગોંગડી ત્રિશા (24)એ ત્રીજી વિકેટ માટે 46 રનની ભાગીદારી કરીને ભારતને જીતની નજીક પહોંચાડ્યું. સ્ટોનહાઉસે ત્રિશાને બોલ્ડ કરીને ભારતને ત્રીજો ઝટકો આપ્યો હતો. તિવારીએ વિજયી રન બનાવી ભારતને ચેમ્પિયન બનાવ્યું હતું. ઈંગ્લેન્ડ તરફથી હેન્ના બેકર, ગ્રેસ સ્ક્રિવેન્સ અને એલેક્સા સ્ટોનહાઉસને એક-એક વિકેટ મળી હતી.

ભારતીય બોલરોનો દબદબો રહ્યો
આ પહેલા ભારતીય કેપ્ટન શેફાલી વર્માએ ટોસ જીતીને પ્રથમ બોલિંગ કરવાનો નિર્ણય લીધો હતો, જેને તેના બોલરોએ યોગ્ય ઠેરવ્યો હતો. તિતાસ સાધુએ લિબર્ટી હીપને ખાતું પણ ખોલવા દીધું ન હતું અને પોતાના બોલ પર એક સરળ કેચ લીધો હતો.

આ પછી અર્ચના દેવીએ ચોથી ઓવરમાં નિયામ હાઉલેન્ડ (10) અને ગ્રેસ સ્ક્રિવન્સ (4)ને પોતાનો શિકાર બનાવ્યા. સાધુએ પોતાના સ્પેલની છેલ્લી ઓવરમાં સાયરન સ્મેલ (3)ને બોલ્ડ કરી ઈંગ્લેન્ડને બેકફૂટ પર લાવી દીધું હતું. ઈંગ્લેન્ડે 22 રનમાં 4 વિકેટ ગુમાવી દીધી હતી.

ભારતીય બોલરોએ વર્ચસ્વ જાળવી રાખ્યું હતું અને ઈંગ્લેન્ડને રિકવર થવાની કોઈ તક આપી ન હતી. પાર્શ્વી ચોપરાએ કરીસ પાવલે (2)ને એલબીડબલ્યુ આઉટ કરીને ઈંગ્લેન્ડને પાંચમો ઝટકો આપ્યો હતો. અર્ચના દેવીએ ચોપરાની બોલ પર શોર્ટ કવર પર અદભૂત કેચ લઈને રાયના મેકડોનાલ્ડ ગેની ઇનિંગ્સનો અંત લાવ્યો હતો.

આ જોઈને ઈંગ્લેન્ડની આખી ટીમ માત્ર 68 રનમાં જ સમેટાઈ ગઈ. ભારત તરફથી તિતાસ સાધુ, અર્ચના દેવી અને પાર્શ્વી ચોપરાએ બે-બે વિકેટ લીધી હતી. મન્નત કશ્યપ, શેફાલી વર્મા અને સોનમ યાદવના ખાતામાં એક-એક સફળતા મળી.