અફઘાનિસ્તાનમાં UNને આંચકો, તાલિબાને હવે UN મહિલા કર્મચારીઓ પર પણ પ્રતિબંધ મૂક્યો

અફઘાનિસ્તાનમાં તાલિબાન સરકારે મહિલાઓ પર ઘણા નિયંત્રણો લાદ્યા છે અને હવે આ સરકારે સંયુક્ત રાષ્ટ્રની મહિલા કર્મચારીઓ પર પ્રતિબંધ મૂક્યો છે. નવા આદેશ બાદ યુએન મહિલા અફઘાન સ્ટાફ પર અફઘાનિસ્તાનમાં કામ કરવા પર પ્રતિબંધ લગાવી દેવામાં આવ્યો છે. આ માહિતી સંયુક્ત રાષ્ટ્રના અધિકારીઓએ આપી છે.

સંયુક્ત રાષ્ટ્ર મિશન તાલિબાન સરકારના આદેશ બાદ તેની મહિલા કર્મચારીઓ પર લગાવવામાં આવેલા પ્રતિબંધ અંગે ગંભીર ચિંતા વ્યક્ત કરી છે. યુએનના પ્રવક્તા સ્ટેફન ડુજારિકે જણાવ્યું હતું કે, “અમે સૌથી વધુ સંવેદનશીલ, ખાસ કરીને મહિલાઓ અને છોકરીઓ સુધી પહોંચવાના અમારા પ્રયાસો ચાલુ રાખીશું.”

તેમણે કહ્યું કે યુએનના અધિકારીઓને વિવિધ ચેનલો દ્વારા કહેવામાં આવ્યું હતું કે દેશભરમાં પ્રતિબંધ લાગુ છે. આ સમગ્ર મામલે તાલિબાન સરકાર તરફથી કોઈ નિવેદન આવ્યું નથી.

તાલિબાન સરકારે અફઘાનિસ્તાનમાં સત્તામાં આવતા પહેલા ઉદાર શાસનને લગતા ઘણા વચનો આપ્યા હતા, પરંતુ સત્તામાં આવ્યા બાદ તાલિબાને મહિલાઓના અધિકારો વિરુદ્ધ ઘણા કડક નિર્ણયો લીધા છે.

સરકારી આદેશ અનુસાર અફઘાનિસ્તાનમાં છોકરીઓને છઠ્ઠા ધોરણ પછી ભણવા પર પ્રતિબંધ છે. મહિલાઓને કામ કરવા, અભ્યાસ કરવા, પુરૂષ સાથી વગર મુસાફરી કરવા અને પાર્કમાં જવાની પણ મનાઈ છે. તેમજ મહિલાઓને માથાથી પગ સુધી ઢાંકવા માટે કહેવામાં આવ્યું છે.

અફઘાન મહિલાઓને રાષ્ટ્રીય અને આંતરરાષ્ટ્રીય બિન-સરકારી સંસ્થાઓમાં કામ કરવા પર પણ પ્રતિબંધ છે. યુએન માટે કામ કરતી મહિલાઓને એનજીઓ પ્રતિબંધમાં સામેલ કરવામાં આવી ન હોવા છતાં, યુએનએ આશંકા વ્યક્ત કરી હતી કે યુએન માટે કામ કરતી મહિલાઓને નિશાન બનાવવામાં આવી શકે છે.

યુએનના મહાસચિવ એન્ટોનિયો ગુટેરેસે કહ્યું છે કે આ પ્રકારનો કોઈપણ પ્રતિબંધ અસ્વીકાર્ય અને સ્પષ્ટપણે અકલ્પનીય હશે. તેમણે કહ્યું કે આનાથી અમારા કામને કેટલી અસર થશે તેની માહિતી હવે અમે મેળવી રહ્યા છીએ. સાથે જ તેમણે કહ્યું કે ટૂંક સમયમાં કાબુલમાં અધિકારીઓ સાથે વાતચીત થશે.

દુજારિકે કહ્યું કે મહિલા સ્ટાફ સભ્યો જમીન પર યુએનના જીવન રક્ષક મિશન હાથ ધરવા માટે જરૂરી છે. તેમણે કહ્યું કે સંયુક્ત રાષ્ટ્રના અફઘાનિસ્તાનમાં લગભગ 3,900 કર્મચારીઓ છે, જેમાં લગભગ 3,300 અફઘાન અને 600 આંતરરાષ્ટ્રીય કર્મચારીઓ છે. જેમાં 600 અફઘાન મહિલાઓ અને અન્ય દેશોની 200 મહિલાઓનો સમાવેશ થાય છે.