ભાવનગર જિલ્લા મેજીસ્ટ્રેટ : તહેવારોને અનુલક્ષીને તિક્ષ્ણ હથિયારો સાથે રાખવા પર પ્રતિબંઘ

કૌશિક શીશાંગીયા

આગામી સપ્ટેમ્બર/૨૦૨૨ – ઓક્ટોબર/૨૦૨૨ ના માસ દરમિયાન તા.૨૬/૦૯/૨૦૨૨ ના રોજ નવરાત્રી પ્રારંભ, તા.૨/૧૦/૨૦૨૨ ના રોજ ગાંધી જયંતી, તા. ૫/૧૦/૨૦૨૨ ના રોજ દશેરા, તા. ૯/૧૦/૨૦૨૨ ના રોજ ઈદે મિલાદ, તા.૧૩/૧૦/૨૦૨૨ ના રોજ સંકટ ચતુર્થી, તા.૨૧/૧૦/૨૦૨૨ ના રોજ વાઘ બારસ, તા. ૨૨/૧૦/૨૦૨૨ ના રોજ ધન તેરસ, તા.૨૩/૧૦/૨૦૨૨ ના રોજ કાળી ચૌદસ, તથા તા.૨૪/૧૦/૨૦૨૨ ના રોજ દિવાળી વગેરે તહેવારો/ઉત્સવો ઉજવનારા હોય, આ દિવસોમા કાયદો અને વ્યવસ્થા જાળવવા તથા આ તહેવારો દરમ્યાન સુલેહ શાંતિ જળવાય રહે તેમજ રાજ્યની વર્તમાન પરિસ્થિતિને અનુલક્ષીને અગમચેતીના પગલા લેવા અનિવાર્ય જણાતા સમગ્ર ભાવનગર જિલ્લામાં લોકો જાહેરમાં તિક્ષ્ણ હથીયાર જેવા કે છરી, કુંહાડી, ઘારીયા, તલવાર, ગુપ્તી, કુંડેલીવાળી લાકડીઓ, લોખંડના પાઇપ, ભાલા વગેરે જેવા પ્રાણઘાતક હથિયાર લઇને હરે ફરે નહિ તે માટે પ્રતિબંઘ ફરમાવતુ જાહેરનામુ જાહેર શાંતિ અને સલામતી જાળવવા સારુ બહાર પાડવુ જરૂરી જણાતા અઘિક જિલ્લા મેજીસ્ટ્રેટ, ભાવનગર દ્વારા ઉપર મુજબના પ્રાણઘાતક હથિયારો સાથે રાખવા પર પ્રતિબંધ મુક્તુ જાહેરનામુ બહાર પાડવામા આવેલ છે.

આ જાહેરનામું તા.૨૭/૯/૨૨ થી તા. ૨૬/૧૦/૨૨ સુઘી અમલમા રહેશે. આ જાહેરનામાનો કોઇ ખંડનો ભંગ અથવા ઉલ્લંઘન કરનારને ઓછામાં ઓછી ચાર મહિનાની અને વઘુમાં વઘુ એક વર્ષની કેદની સજા અને ગુજરાત પોલીસ અઘિનિયમ-૧૯૫૧ની કલમ-૧૩૫(૧) મુજબની દંડની સજા થશે તેમ અઘિક જિલ્લા મેજીસ્ટ્રેટ, ભાવનગર દ્વારા જાહેરનામું પ્રસિદ્ધ કરી જણાવાયું છે.