સિહોર : વિદ્યામંજરી જ્ઞાનપીઠ ખાતે વેલેન્ટાઇન ડે ની અનોખી રીતે ઉજવણી કરાઈ

દેવરાજ

આજે સમગ્ર વિશ્વ પાશ્ચાતય સંસ્કૃતિનું આધળું અનુકરણ કરી વેલેન્ટાઇન ડે ઉજવવામાં મશગુલ છે. વૃધ્ધાશ્રમની સંખ્યા વધી રહી છે, માં-બાપ અને સંતાનો વચ્ચેની આત્મીયતા ઘટી રહી છે. ત્યારે સિહોરની નામાંકિત શિક્ષણિક સંસ્થા વિદ્યામંજરી જ્ઞાનપીઠ દ્વારા વિધાર્થીઓમાં પોતાના માતા-પિતા અને ગુરૂજનો માટે સન્માન વધે, ભાવિ પેઢીના માતા-પિતા પ્રત્યે આદરની ભાવના કેળવાય અને સંસ્કાર સિંચન થાય તેવા હેતુથી વિદ્યામંજરી જ્ઞાનપીઠ ખાતે માતૃ-પિતૃ પૂજનના કાર્યક્રમનું આયોજન કરવામાં આવ્યું હતું.

કાર્યક્રમની શરૂઆતમાં પુલવામાં એટેકમાં શહીદ થયેલા જવાનોને 2 મીનીટનું મોન પાળી શ્રદ્ધાજલી અર્પણ કરવામાં આવી હતી. વિધાર્થીઓ વેલેન્ટાઇન ડે જેવા પશ્ચિમી દેશોનું આંધળું અનુકરણ ન કરે તે માટેના વિચારો રજૂ કરવામાં આવ્યા, તેમજ વિધાર્થીઓના માતા-પિતાને આમંત્રણ આપી તેમના સંતાનો દ્વારા બ્રહ્મદેવોના વૈદિક મંત્રોચ્ચાર સાથે માતા-પિતા અને ગુરૂજનોનું પૂજન કરવામાં આવ્યું. વિધાર્થીઓએ માતા-પિતાની આરતી ઉતારી, પૂજા અર્ચના કરી તેમજ પ્રદક્ષિણા ફરી અને આર્શિવાદ મેળવ્યા હતા.

સૌપ્રથમ વિદ્યાર્થીઓએ પોતાના માતા-પિતાનું કુમકુમ તિલક કર્યુ હતુ. ત્યારબાદ વિદ્યાર્થીઓએ પોતાનાં માતા-પિતાને હાર પહેરાવ્યો અને તેમના ચરણોને ધોઈને, આરતી ઉતારીને માતા-પિતાના આશીર્વાદ પ્રાપ્ત કર્યા હતા. તેમજ વિદ્યાર્થીઓ અને શાળાના શિક્ષકો દ્વારા માતૃપિતૃ દિવસને અનુરૂપ વક્તવ્યો અને સુંદર ગીતો ગાયા હતા. વિદ્યાર્થીના વાલીઓએ પણ માતૃપિતૃ દિવસ અનુરૂપ વક્તવ્યો આપ્યા હતા. આ કાર્યક્રમને સફળ બનાવવાં માટે શાળા પરીવારે ભારે જહેમત ઉઠાવી હતી.