રાહુલ ગાંધીની લોકસભા સીટ પર પેટાચૂંટણી ક્યારે યોજાશે? ચૂંટણી પંચે આપ્યો આ જવાબ

કેરળની વાયનાડ લોકસભા સીટ પરથી કોંગ્રેસના સાંસદ રાહુલ ગાંધીની લોકસભાની સદસ્યતા રદ્દ થયા બાદ સવાલો ઉઠવા લાગ્યા છે કે વાયનાડ લોકસભા સીટ માટે પેટાચૂંટણી ક્યારે યોજાશે. આ પ્રશ્નના જવાબમાં ચૂંટણી પંચે કહ્યું કે અમને આ માટે કોઈ ઉતાવળ નથી.

ચૂંટણી પંચે બુધવારે કહ્યું હતું કે કેરળની વાયનાડ લોકસભા બેઠકની પેટાચૂંટણીની જાહેરાત કરવાની કોઈ ઉતાવળ નથી કારણ કે રાહુલ ગાંધીને તેમની સભ્યપદ પુનઃસ્થાપિત કરવા માટે અપીલ કરવા માટે કોર્ટે 30 દિવસનો સમય આપ્યો છે.

મુખ્ય ચૂંટણી કમિશનર રાજીવ કુમારે કહ્યું કે ચૂંટણી પંચે ખાલી પડેલી બેઠકો પર પેટાચૂંટણી ફેબ્રુઆરી સુધી કરાવવાનો નિર્ણય લીધો છે. તેણે કહ્યું, ‘કોઈ ઉતાવળ નથી, અમે રાહ જોઈશું. અદાલતે જે (ન્યાયિક) ઉપાયની વાત કરી છે તેને પૂર્ણ કરવાની (અમારી તરફથી) કોઈ ઉતાવળ નથી. તે પછી અમે પગલાં લઈશું.

ચૂંટણી કમિશનર રાજીવ કુમારના જણાવ્યા અનુસાર, વાયનાડ લોકસભા બેઠકની ખાલી જગ્યા માટેની સૂચના 23 માર્ચે આવી હતી. કાયદો જણાવે છે કે બેઠક ખાલી થયાના 6 મહિનાની અંદર પેટાચૂંટણી યોજવી જોઈએ. ઉપરાંત, કાયદા હેઠળ, જો લોકસભાનો કાર્યકાળ એક વર્ષથી ઓછો હોય, તો પેટા ચૂંટણીઓ યોજવામાં આવતી નથી.

મુખ્ય ચૂંટણી કમિશનરે કહ્યું કે વાયનાડ લોકસભા સીટની ચૂંટણીમાં એક વર્ષથી વધુ સમય બાકી છે. વાસ્તવમાં, કોંગ્રેસ નેતા રાહુલ ગાંધીને સુરતની કોર્ટે 2019માં આપેલા નિવેદનના કેસમાં દોષી ઠેરવીને બે વર્ષની સજા ફટકારી છે. આ પછી લોકસભા સચિવાલયે તેમની લોકસભાની સદસ્યતા રદ કરી દીધી છે. જો તેમની સદસ્યતા પુનઃસ્થાપિત કરવામાં નહીં આવે તો તેઓ 2024ની લોકસભાની ચૂંટણી પણ લડી શકશે નહીં.