Red fort Attack Case: મોહમ્મદ આરીફને સુપ્રીમ કોર્ટનો મોટો ફટકો, ફાંસીની સજા યથાવત

Red fort Attack Case: સુપ્રીમ કોર્ટે લશ્કર-એ-તૈયબાના આતંકવાદી અને પાકિસ્તાની નાગરિક મોહમ્મદ આરીફ ઉર્ફે અશફાકની 2000ના લાલ કિલ્લા હુમલાના કેસમાં આપવામાં આવેલી મૃત્યુદંડની સજાને યથાવત રાખતા સર્વોચ્ચ અદાલતના અગાઉના આદેશને પડકારતી સમીક્ષા અરજીને ફગાવી દીધી હતી. જણાવી દઈએ કે આતંકવાદી સંગઠન લશ્કર-એ-તૈયબા દ્વારા કરવામાં આવેલા હુમલામાં બે સૈનિકો સહિત 3 લોકોએ જીવ ગુમાવ્યા હતા.

લાલ કિલ્લા પર થયેલા હુમલામાં 3 લોકોએ જીવ ગુમાવ્યા હતા

લાલ કિલ્લા પર 22 ડિસેમ્બર 2000ના રોજ આતંકવાદી સંગઠન લશ્કર-એ-તૈયબા દ્વારા હુમલો કરવામાં આવ્યો હતો. આ હુમલામાં બે જવાનો સહિત ત્રણ લોકો માર્યા ગયા હતા. હુમલા બાદ ભારતીય સેનાની જવાબી કાર્યવાહીમાં લાલ કિલ્લામાં ઘૂસણખોરી કરનારા બે આતંકવાદીઓને પણ ઠાર કરવામાં આવ્યા હતા. આ કેસમાં 31 ઓક્ટોબર 2005ના રોજ નીચલી અદાલતે મોહમ્મદ આરિફને દોષિત ઠેરવ્યો અને તેને મૃત્યુદંડની સજા સંભળાવી.

સુપ્રીમ કોર્ટ તરફથી મોહમ્મદ આરીફને ફરી એકવાર ઝટકો લાગ્યો છે

મોહમ્મદ આરિફે 2013માં નીચલી કોર્ટમાંથી ફાંસીની સજા મળ્યા બાદ સુપ્રીમ કોર્ટનો સંપર્ક કર્યો હતો. જોકે, સુપ્રીમ કોર્ટે આરિફની ફાંસીની સજાને યથાવત રાખતી રિવ્યુ પિટિશનને ફગાવી દીધી હતી. આ પછી 2014માં સુપ્રીમ કોર્ટે આરિફની ક્યુરેટિવ પિટિશન પણ ફગાવી દીધી હતી. હવે ફરી એકવાર સુપ્રીમ કોર્ટે દોષિતોની સજાને લઈને દાખલ કરવામાં આવેલી સમીક્ષા અરજીને પણ ફગાવી દીધી છે.

સુપ્રીમ કોર્ટે વર્ષ 2015માં આ મામલે ઐતિહાસિક પગલું ભર્યું હતું. વાસ્તવમાં, આ પહેલા, ન્યાયાધીશ તેમની ચેમ્બરમાં સમીક્ષા અરજીની સુનાવણી કરતા હતા. 2015માં યાકુબ મેમણ અને મોહમ્મદ આરીફની અરજી પર ખુલ્લી અદાલતમાં સુનાવણી થઈ હતી.