‘પૂર્વ મુખ્યમંત્રીએ નિયમોની અવગણના કરીને સ્થાપના કરી કૌશલ્ય વિકાસ નિગમની’, CID વડાનું નિવેદન

આંધ્રપ્રદેશના પૂર્વ મુખ્યમંત્રી અને ટીડીપીના વડા એન ચંદ્રબાબુ નાયડુ સામે મુસીબતો વધી રહી છે. રાજ્ય CIDનું કહેવું છે કે સ્કિલ ડેવલપમેન્ટ કોર્પોરેશનને લગતા અલગ-અલગ દસ્તાવેજોમાં નાયડુના 13 હસ્તાક્ષર મળી આવ્યા છે, જે નિયમોની અવગણના કરીને કરવામાં આવ્યા હતા.

બાબુએ કૌભાંડની યોજના ઘડી : CID ચીફ

આંધ્ર પ્રદેશ CID ચીફ એન સંજયે બુધવારે પ્રેસ કોન્ફરન્સ કરી હતી. આ દરમિયાન સંજયે કહ્યું કે કૌશલ્ય વિકાસ કૌભાંડમાં નાયડુની ભૂમિકા જોવા મળી છે, જેના કારણે તેમને આરોપી ગણવામાં આવ્યા છે. કોર્પોરેશનની સ્થાપના સમયે નાયડુએ મુખ્યપ્રધાન રહીને નિયમોનું પાલન કર્યું ન હતું. તેણે નિયમોને બાયપાસ કરીને સરકારી સંસ્થા દ્વારા ખાનગી પક્ષોને પૈસા આપ્યા. આ સમગ્ર કૌભાંડ બાબુ દ્વારા કરવામાં આવ્યું હોવાનું પ્રાથમિક દૃષ્ટિએ બહાર આવ્યું છે.

સરકારી તિજોરીને 300 કરોડનું નુકસાન

સંજયે કહ્યું કે કોર્પોરેશનની સ્થાપના માટે કેબિનેટની મંજૂરી જરૂરી છે. પરંતુ નાયડુએ આવું ન કર્યું. તેમણે કહ્યું કે આ મામલે અટકળોને કારણે હકીકતો સ્પષ્ટ કરવી યોગ્ય છે. કૌશલ્ય વિકાસનો મામલો દક્ષિણ રાજ્યમાં CoE ક્લસ્ટરોની સ્થાપના સાથે સંબંધિત છે. આ પ્રોજેક્ટનો કુલ અંદાજ 3300 કરોડ રૂપિયા છે. આ કેસમાં સરકારી તિજોરીને 300 કરોડથી વધુનું નુકસાન થયું છે. સંજયે કહ્યું કે નાયડુએ કેબિનેટની મંજૂરી વગર કોર્પોરેશનની સ્થાપના કરી. વધુમાં, ભૂતપૂર્વ મુખ્યમંત્રીએ કોર્પોરેશનના વડા તરીકે ગંતા સુબ્બા રાવ જેવા ખાનગી વ્યક્તિની નિમણૂક કરી હતી. નાયડુએ નાણા વિભાગની એક નોંધમાં વ્યક્તિગત રીતે રૂ. 371 કરોડ મંજૂર કર્યા હતા.

આખરે ભ્રષ્ટાચારનો સમગ્ર મામલો શું છે?

આ યોજના આંધ્રપ્રદેશમાં ચંદ્રબાબુ નાયડુની સરકાર દરમિયાન યુવાનોને કૌશલ્ય વિકાસની તાલીમ આપવા માટે શરૂ કરવામાં આવી હતી. આ યોજના યુવાનોને હૈદરાબાદ અને તેની આસપાસના વિસ્તારોમાં સ્થિત ભારે ઉદ્યોગોમાં કામ કરવા માટે જરૂરી કૌશલ્ય વિકાસ તાલીમ પૂરી પાડવાની હતી. આ યોજના હેઠળ સરકારે તેની જવાબદારી સિમેન્સ નામની કંપનીને આપી હતી. યોજના હેઠળ, છ ક્લસ્ટર બનાવવામાં આવ્યા હતા, દરેક ક્લસ્ટર પર 560 કરોડ રૂપિયા ખર્ચવાના હતા. એટલે કે આ યોજના પાછળ કુલ 3,300 કરોડ રૂપિયા ખર્ચવાના હતા.

તત્કાલીન ચંદ્રાબાબુ નાયડુ સરકારે કેબિનેટને જણાવ્યું હતું કે આ યોજના હેઠળ રાજ્ય સરકાર કુલ ખર્ચના 10 ટકા એટલે કે 370 કરોડ રૂપિયા ખર્ચ કરશે. બાકીનો 90 ટકા ખર્ચ કૌશલ્ય વિકાસ તાલીમ કંપની સિમેન્સ દ્વારા ઉઠાવવામાં આવશે. એવો આરોપ છે કે ચંદ્રબાબુ નાયડુની સરકારે આ યોજના હેઠળ ખર્ચ કરવા માટેના 371 કરોડ રૂપિયા શેલ કંપનીઓને ટ્રાન્સફર કર્યા હતા. પૂર્વ સીએમ પર એવો પણ આરોપ છે કે શેલ કંપનીઓ બનાવવા અને તેમને પૈસા ટ્રાન્સફર કરવાના દસ્તાવેજો પણ નષ્ટ કરવામાં આવ્યા હતા.

ટીડીપી વડાએ આરોપો પર શું કહ્યું?

તેલુગુ દેશમ પાર્ટીના વડા ચંદ્રબાબુ નાયડુએ પણ આ કાર્યવાહી પર પ્રતિક્રિયા આપી છે. નાયડુએ એક એક્સ-પોસ્ટમાં લખ્યું, ’45 વર્ષથી મેં નિઃસ્વાર્થપણે તેલુગુ લોકોની સેવા કરી છે. તેમના હિતોની રક્ષા માટે હું મારા જીવનનું બલિદાન આપવા તૈયાર છું. તેલુગુ લોકો, મારા આંધ્રપ્રદેશ અને મારી માતૃભૂમિની રક્ષા કરતા મને કોઈ બળ રોકી શકશે નહીં. અંતે સત્ય અને ધર્મનો જ વિજય થશે.