કોંગ્રેસે અનેક સંસદીય સમિતિઓની અધ્યક્ષતા ગુમાવી, ભાજપના સાથી પક્ષોને 6 મોટી પેનલો મળી

સંસદની સંસદીય સમિતિઓમાં વ્યાપક ફેરબદલ કરવામાં આવ્યા છે. મંગળવારે જાહેર કરવામાં આવેલા તાજેતરના ફેરબદલમાં, વિરોધ પક્ષોને ગૃહ બાબતો અને માહિતી પ્રૌદ્યોગિક સમિતિ સહિત ચાર મુખ્ય સંસદીય પેનલોમાંથી કોઈપણની અધ્યક્ષતા આપવામાં આવી નથી. આ સાથે, ભાજપ અને તેના સહયોગીઓ છ મુખ્ય સંસદીય સમિતિઓ ગૃહ, આઈટી, સંરક્ષણ, વિદેશ, નાણાં અને આરોગ્યની અધ્યક્ષતા કરે છે. ભાજપે તેને રૂટિન બદલાવ ગણાવ્યો છે. વિરોધ પક્ષોએ તેને ભેદભાવપૂર્ણ ગણાવ્યું હતું.

ફેરબદલ બાદ આ છે સંસદીય સમિતિઓ

ભાજપના સાંસદ અને ઉત્તર પ્રદેશના નિવૃત્ત IPS અધિકારી બ્રિજ લાલને કોંગ્રેસના સાંસદ અભિષેક મનુ સિંઘવીના સ્થાને ગૃહ મામલાની સંસદીય સ્થાયી સમિતિના અધ્યક્ષ બનાવવામાં આવ્યા છે. સંસદ સભ્ય શશિ થરૂર, જેઓ કોંગ્રેસ અધ્યક્ષ પદ માટે ચૂંટણી લડી રહ્યા છે, તેમના સ્થાને શિંદે જૂથના શિવસેના સાંસદ પ્રતાપરાવ જાધવને માહિતી ટેકનોલોજી પરની સંસદીય પેનલના વડા તરીકે નિયુક્ત કરવામાં આવ્યા છે.

ટીએમસીને કોઈપણ સંસદીય સમિતિની અધ્યક્ષતા આપવામાં ન આવી

પહેલા તૃણમૂલ કોંગ્રેસ પાસે ખાદ્ય અને ગ્રાહક બાબતોની સંસદીય પેનલની અધ્યક્ષતા હતી. ફેરબદલ બાદ ટીએમસીને કોઈપણ સંસદીય સમિતિની અધ્યક્ષતા આપવામાં આવી નથી. રાજ્યસભામાં ટીએમસીના નેતા ડેરેક ઓ બ્રાયને કહ્યું કે ટીએમસી સંસદમાં ત્રીજી સૌથી મોટી પાર્ટી છે. બીજી સૌથી મોટી વિપક્ષી પાર્ટીને એક પણ પ્રમુખ મળ્યો નથી. સૌથી મોટી વિપક્ષી પાર્ટીએ સ્થાયી સમિતિઓના બે મહત્વપૂર્ણ અધ્યક્ષો ગુમાવ્યા છે. ન્યુ ઈન્ડિયાની આ કડવી વાસ્તવિકતા છે.

આ પણ થયો બદલાવ

સમાજવાદી પાર્ટીના નેતા રામ ગોપાલ યાદવને સ્વાસ્થ્ય અને પરિવાર કલ્યાણ અંગેની સંસદીય સ્થાયી સમિતિના અધ્યક્ષ તરીકે બદલવામાં આવ્યા છે. ખાદ્ય સમિતિઓની પેનલનું નેતૃત્વ ભાજપના સાંસદ લોકેટ ચેટર્જી કરશે અને આરોગ્ય પરની સંસદીય સમિતિનું નેતૃત્વ તેમના પક્ષના સાથી વિવેક ઠાકુર કરશે. ઉપરાંત, ડીએમકેને ઉદ્યોગ પરની સંસદીય પેનલની અધ્યક્ષતા આપવામાં આવી છે જે અત્યાર સુધી ટીઆરએસ પાસે હતી.