ચેન્નાઈ ચેપોકમાં અત્યાર સુધીમાં 4 પ્લેઓફ મેચ રમી ચૂક્યું છે, જાણો કેવું રહ્યું આ મેચોમાં પ્રદર્શન

મહેન્દ્ર સિંહ ધોનીની કપ્તાની હેઠળ, ચેન્નાઈ સુપર કિંગ્સ (CSK) IPL ઈતિહાસમાં 12મી વખત પ્લેઓફમાં જગ્યા બનાવવામાં સફળ રહી. આ સિઝનની છેલ્લી લીગ મેચમાં દિલ્હી કેપિટલ્સને હરાવ્યા બાદ, ચેન્નાઈએ 17 પોઈન્ટ સાથે બીજા સ્થાને લીગ સ્ટેજ સમાપ્ત કર્યું. હવે પ્રથમ ક્વોલિફાયર મેચમાં CSKનો સામનો ડિફેન્ડિંગ ચેમ્પિયન ગુજરાત ટાઇટન્સ સામે થશે.

બંને ટીમો વચ્ચે 23 મેના રોજ સાંજે 7:30 વાગ્યે ચેન્નાઈના ચેપોક સ્ટેડિયમમાં મેચ રમાશે. ગુજરાત ટાઇટન્સે લીગ સ્ટેજમાં 20 પોઈન્ટ સાથે પ્રથમ સ્થાને સમાપ્ત કર્યું. પોતાના હોમ ગ્રાઉન્ડ પર રમી રહેલી ચેન્નાઈ સુપર કિંગ્સનું આ પ્રથમ ક્વોલિફાયરમાં થોડુ ભારે ગણી શકાય. જો કે ચેપોક સ્ટેડિયમમાં રમાયેલી પ્લેઓફ મેચોમાં ચેન્નાઈનો અત્યાર સુધીનો રેકોર્ડ જોવામાં આવે તો તે 50-50નો જોવા મળ્યો છે.

ચેન્નાઈ આઈપીએલમાં અત્યાર સુધી 24 પ્લેઓફ મેચ રમી ચુકી છે. તેમાંથી તેણે 15માં જીત અને 9માં હારનો સામનો કરવો પડ્યો છે. ચેપોક સ્ટેડિયમમાં રમાયેલી પ્લેઓફ મેચોમાં CSKના રેકોર્ડ પર નજર કરીએ તો તે 4 મેચમાં 2 જીત અને 2 હાર છે. વર્ષ 2011માં ચેન્નાઈએ રોયલ ચેલેન્જર્સ બેંગ્લોર સામેની ફાઈનલ મેચ 58 રને જીતી હતી.

ચેપોકમાં ચેન્નાઈ સુપર કિંગ્સે છેલ્લી 2 પ્લેઓફ મેચમાં હારનો સામનો કરવો પડ્યો હતો

ત્યારબાદ CSKએ 2012માં દિલ્હી કેપિટલ્સ સામેની બીજી ક્વોલિફાયર મેચમાં 86 રનથી જીત મેળવી હતી. 2012ની ફાઈનલ મેચમાં ચેન્નાઈને આ મેદાન પર કોલકાતા સામે 5 વિકેટે હારનો સામનો કરવો પડ્યો હતો. વર્ષ 2019માં મુંબઈ ઈન્ડિયન્સ સામેની ક્વોલિફાયર 1 મેચમાં પણ ચેન્નાઈને 6 વિકેટથી હારનો સામનો કરવો પડ્યો હતો.